Vuostáiváldit buorren guossin ja oavdudagut

Publius ii dáidde dat olbmonamma Biibbalis man mii dovdat nu bures. Muhto dát olmmái lei guovddážis dalle go Paulus lei fáŋga ja dolvojuvvui Jerusalemis Romai.
Gaskaábis borjjástii fáŋgafanas, mátkkis deaividedje váttisvuođat ja fanas devdui. Buot olbmot fatnasis besse dearvan gáddái, sin lihkku lei go fanas cohkkui sáttonuorrái Maltas. Dakko lahkosiin lei stuoradállu, mii gulai oaivámužžii gii eaiggádušai sullo, su namma lei Publius. Son vuostáiválddii ustitlaččat čáhceheađálaččaid iežas guossin. Ieš beasai muosáhit ahte su áhčči dearvvašmahttojuvvui. Paulus rohkadalai dán olbmá ovddas ja buozanvuohta guđii su. Son šattai dearvvašin. Maiddái eará oavdudagut čuvvo. Olbmot vásihedje ahte Jesus, gean birra Paulus sárdnidii, attii oskku ja fámu olmmošlaš gillámušaid siste. Mearkkat ja oavdudagut dáhpáhuvve go evangelium čuojai. Maiddái dán áiggi beassat mii buktit Ipmila ovdii buot áššiid rohkosis, maiddái buozanvuođaid.

Publisert: 07.09.2010

Utskriftsversjon